政情：佛教界祈福法會 願港早日平亂
本地佛教界尋日喺香港佛教聯合會文化中心，舉行「莊嚴國土利樂有情祈福法會」。是次法會嘅緣起，係由於近來社會不寧同人心不安，指香港接連受到社會暴力同疫情打擊，經濟受挫，市民嘅生活受到極大妨擾。然而，令市民更為憂慮嘅係，天災尚見改善，人暴就唔知幾時先至去到盡頭。
香港佛教聯合會引用佛經言「境內外劫盜，方便斷令息。」呼籲民眾應該向任何暴力及違法行為說不，而施政者亦必須負責任平息社會犯罪，保障香港市民嘅生命財產安全。
互諒包容 共謀出路
該會又衷心祈盼香港能早日走出怨懟紛爭，大家可再重新出發，以互諒包容之心共謀出路。
為咗希望香港早日回復正軌，今次祈福法會諷誦《心經》同埋《觀世音菩薩普門品》，寓意藉觀音菩薩嘅大慈大悲，廣濟眾生，化解大眾嘅苦惱。就好似寬運法師喺祈願文入面引用《心經》嘅「願顛倒之人遠離妄念、恐懼之人心無罣礙、苦難之人永得安樂。」
為配合政府嘅防疫政策，法會只邀請佛聯會董事成員及佛教道場代表參與，並由佛聯會會長寬運大和尚、佛聯會執行副會長道平大和尚、香港佛教僧伽聯合會會長紹根長老、同寶蓮寺禪寺方丈凈因大和尚主法。