中環出更：憲報寫錯禁聚令生效日 食衞局鬼祟更正
食物及衞生局就禁聚令的憲報公告出錯，竟然將規例指明生效日期寫成六月十八日，惟實際上應是六月五日，變相使禁令失效。我哋喺前晚約九時半向食衞局查詢，大約一小時後獲回覆：「有關指明日期應為六月五日，我們會盡快更正有關公告。」
出錯早有前科
其後，食衞局已鬼祟更正公告，但沒有交代出錯。憲報二○二○年第五十八號號外公告是「預防及控制疾病（禁止羣組聚集）規例」，由食物及衞生局局長發出，行使規例所賦予的權力，為施行規例，指明由六月五日至六月十八日的該段十四日期間生效。
食衞局寫錯禁聚令生效日期早有前科，話說喺四月下旬，政府宣布再延長禁聚令十四日，食衞局當日上晝近十一點半出稿，講解有關禁聚令嘅最新安排，當中包括「撤銷食肆顧客數目不得超過店內座位數目一半」嘅限制，而新指示會喺翌日凌晨十二點起生效，但局方稿件嘅註腳就寫錯日期，比原定日期提前咗一日。局方仲要後知後覺，相隔咗成廿九個鐘頭先再發稿更正。
而喺四月初，食衞局誤報美容院、會所同按摩院須因應新冠肺炎疫情關閉，仲刊埋憲添，令唔少經營者都信以為真，為免犯法，急急腳拉閘停業，點知政府事隔唔夠三個鐘就「二次刊憲」澄清，話上述嘅三類場所可以繼續營業至真。一個月兩次甩轆，點到啲商戶陀陀擰。
卓妮