中環出更：養生抗疫 陳永光推介保健湯水

查實有唔少人都好擔心會染上新冠肺炎，唔知有咩方法可以強身健體呢？陳永光就向大家介紹咗幾款食療湯水，分別針對唔同人嘅體質，希望幫到大家喺「疫境」中增強免疫力。之不過，同場嘅中總副會長李應生就話，查實上班一族平時咁忙，都未必有時間煲湯，咁點算呢？

花旗參焗水 清熱解毒

陳永光就話，其實亦都有唔使煲湯嘅簡單做法，例如用羅漢果沖水飲可以起到潤肺扶正嘅作用，而用花旗參焗水飲就可以清熱解毒。佢仲補充話，中成藥同保健茶都需要根據人嘅體質，服用之前最好諮詢中醫意見；但食療就着重保養，所以相對而言算得上老少咸宜。

除咗學習點樣靠食療養生之外，市民更加希望知道疫情幾時先會完結。中總婦女委員會主席蔡關穎琴早前就主持另一節網上專題講座，並邀獲政府委任為專家小組成員嘅梁卓偉擔任嘉賓。

梁卓偉籲市民勿對防疫工作有所鬆懈。

李應生指食療老少咸宜。

梁卓偉：適應疫境新常態

梁作為抗疫專家，當然乘機呼籲市民唔好因為疫情緩和，而喺防疫工作上有所鬆懈，重申疫情結束時間難以預計咁話喎。

梁卓偉話社會運作、經濟活動冇可能無了期停擺，提到防疫措施必定會有撤銷嘅一日，籲市民目前應該要主動適應呢一種「新常態」。又話，就算依家偶會出現零星感染個案，但其實市民大眾都唔需要太過恐慌，話應該以正面勇敢態度面對！

卓妮