香港居住問題嚴峻，輪候上公屋嘅時間愈拖愈長。立法會房屋事務委員會尋日舉行會議討論過渡性房屋，有議員指出有閒置校舍荒廢超過十年仍未改建成過渡性房屋，又有議員認為過渡性房屋目標係救急，興建速度理應要快，但現時興建時間比公屋更慢。不過，運輸及房屋局副局長蘇偉文就唔同意過渡性房屋起得慢嘅講法，因為興建公屋需時更耐，要廿年喎！雖然佢後來都承認，提升效率方面係有改進空間，但以咁消極嘅態度去處理房屋問題，市民排隊上樓真係遙遙無期啦，人生有幾多個廿年呀？
