政情：陳子遷遇襲 同窗沈豪傑譴責黑暴
律師陳子遷日前喺銅鑼灣街頭遭到圍毆，繼香港律師會日前發出聲明譴責，同陳子遷有同窗之誼嘅元朗區議員沈豪傑，亦於自己嘅社交網站貼文，痛斥黑暴嘅不法行為。
沈豪傑喺貼文指，陳子遷係佢就讀香港大學嘅同學，大家都稱呼佢為TC。沈豪傑大讚TC為人爽直好客，不但係一位專業律師，亦都熱心參與香港律師會事務，貢獻良多。沈豪傑話知悉舊同學遇襲，除咗致以深切慰問，亦強烈譴責施襲嘅暴徒。佢批評暴徒藉人大準備通過國安法為由，喺港島進行連串破壞。而TC路過銅鑼灣時竟被大批黑衣暴徒圍毆至重傷，事件令人髮指！
沈豪傑又話香港黑暴沒完沒了，就算係律師亦不能幸免。佢呼籲所有仍有良知及法治精神嘅律師，一齊起來對抗黑暴，守護大家嘅專業同香港嘅法治。佢又話今次嘅暴力事件再一次證明，為何中央要立「港版國安法」咁話。