政情：風季就殺到 陸頌雄倡設山泥傾瀉預報

議員陸頌雄認為政府可建立完善斜坡安全系統，預測山泥傾瀉的地點同時間，預測每一個斜坡會否倒塌或幾時有較大機會倒塌，以便提醒市民。另外，亦有議員質疑私人斜坡涉及嘅地盤費用龐大，亦唔係每個市民識得點樣維修斜坡，建議政府部門提供相應嘅援助。

試驗智能泥石壩

土力工程處處長及副礦務處處長潘偉強就回應話，若斜坡附近冇專業人士觀察，目前技術唔可以即時預測斜坡倒塌嘅風險，若果斜坡嘅清水突然變成泥水等，就有倒塌嘅迹象，但佢哋會繼續朝住呢個方向努力建造完善機制。佢又話依家正試驗應用現代資訊科技研發嶄新嘅山泥傾瀉偵察系統「智能泥石壩」，嚟監察泥石壩嘅狀況。至於私人斜坡嘅維修問題，潘偉強話市民亦有責任，部門會持續推行社區教育計劃，促私人業主明白維修斜坡對防止山泥傾瀉嘅重要。