政情：勿令港版國安法重蹈逃犯例覆轍 陳健波籲政府把好關解釋條文
政府舊年宣布修訂逃犯條例，結果係點？大家都睇到，就係惹起一連串示威衝突，風波到依家都仲未平息。對於全國人大代表大會即將喺聽日表決「港版國安法」，保險界議員陳健波（波哥）警告港府必須做好把關同解釋條文嘅工作，千祈唔好重蹈修例嘅覆轍，唔好畀人抹黑同誤導市民，搞到人心惶惶。
波哥尋日喺社交平台拍片，話香港經歷人禍，跟住又經歷天災，正當疫情得到緩和，竟然有人想黑暴重臨，咁港人邊有好日子過。佢又話黑暴嘅背後必定有人負責組織同提供資金支持，如果黑暴不斷出現，就好似香港嘅長期病患，試問香港經濟點會好轉？
而佢話「港版國安法」係可以打擊黑暴背後嘅勢力同遏止黑暴捲土重來，唔少港人希望能夠盡快實施亦希望執法工作都喺香港進行，為咗令港人安心，政府必須把好關，解釋條文，唔好重蹈修例嘅覆轍，最終要撤回修例，都未能平息風波。
指港被「新八國聯軍式攻擊」
實際上，世界各地其實好多地方都設有《國安法》，佢話有部分國家話《國安法》唔應該喺香港實施，佢形容呢種「新八國聯軍式攻擊」，將會令到香港喺一、兩年之內有動盪出現，但佢相信公義會企喺佢哋呢邊，風雨過後，香港會迎嚟燦爛陽光。