政情：立會受傷保安遭起底 梁美芬斥《私隱條例》似冇牙虎

黃繼兒亦受害 地址被公開

事緣立法會內務委員會喺今個月八日晏晝召開特別會議爆發激烈衝突，有人喺公眾席上投擲文件，有保安員被文件掟中頭部受傷，須送院治理，而秘書處亦已報警。事後有人喺社交網上放上相關保安員嘅個人資料，跟住就喺好多網轉載，更被網民起底，仲話會對佢哋嘅妻兒不利，有保安工會近日先後到私隱署、政府總部同警察總部請願，譴責有關網上「起底」嘅行為。其實，私隱專員黃繼兒亦有譴責相關行為，有網民甚至同日立即將黃繼兒「起底」，公開佢嘅身份證號碼、住址等詳細資料。

梁美芬尋日喺社交平台貼文，講返立會保安被起底事件，呼籲立法會行政管理委員會跟進事件，亦批評《私隱條例》好似「冇牙老虎」。

促授私隱專員刑事檢控權

梁又促請政府直接授權刑事檢控權畀私隱專員，同時准許專員申請禁制令，禁止公開、披露同轉發受害人資料。佢解釋，因為依家法例規定，專員一定要將收到嘅投訴個案轉介畀律政司，然後先至可以檢控，如果能夠直接授權嘅話，唔單止可以大大縮短司法程序時間，同時加大保護受害人權益嘅範圍。

佢又話最慘嘅就係連保安員嘅屋企人都畀人「起底」，批評「起底」嘅行為同黑社會冇分別，為咗制止呢種風氣蔓延，強調政府必須嚴懲涉事網民，建議罰款由十萬元至五十萬元不等，又話判監亦能加強阻嚇力。至於會唔會要求資訊科技及廣播事務委員會討論「起底」一事，梁美芬就話呢個都係其中一個方法，所以都會考慮。