中環出更：移民潮再現 蕭楚基：香港最舒服
香港移民潮再現，到底邊個地方最適合移居，係近日城中熱門話題。綠色環保互助委員會主席蕭楚基，曾經喺溫哥華呢個港人移民熱選地生活過一段時間。佢話一講到住，就梗係彼邦舒服啦！不過人嘅日常生活並非只得居住，一旦計埋其他生活條件，都係香港好啲。
蕭楚基話好唔習慣當地嘅醫療制度，若果一旦頭暈身（慶）要去睇醫生，即使病到半死都要排隊候診冇話優先。而溫哥華一去到冬季，下晝四點幾就已經暮色四合，大家都打道回府食住家飯，當地亦好少夜生活，唔同香港一出街想食乜都有，購物又方便，夜晚隨時可以搵朋友出嚟傾吓偈、摸吓酒杯底，相較之下自己都係喜歡香港嘅生活方式。
鄧鉅明：唔少人早年移民都回流
太子珠寶鐘錶集團主席鄧鉅明，就話自己未試過長時間喺外國生活，亦冇諗過移民，佢話去外國旅行，遊山玩水吃喝玩樂就無妨，但一講到真正嘅生活，就始終都係香港好。佢又認為香港係福地，日常生活需求應有盡有，自由度又高。佢話有唔少朋友早年移民，但後來都回流返香港。佢話明白到呢段時間各行各業都面對困難，希望大家一齊捱過去。
香港小母牛籌款委員會成員鄧慶治，就話早已習慣香港嘅生活方式，去到外國恐怕會唔慣，況且香港衣食住行樣樣都好方便，到處商機之餘工作機會亦較高。佢認為喺外國打工，即使你同當地人屬同一職級，要晉升的話都係人家優先。佢話香港始終都係自己地方同聲同氣，依家自己退咗休，鍾意去邊就去邊，閒時又可以同啲孫玩吓，不知幾開心。
卓妮