中環出更：工務小組加會又取消 盧偉國：畀機會更多委員討論
工務工程撥款向來都大塞車，工務小組委員會主席盧偉國早前就話，下星期一早上八點半至十點半，將會加開兩小時會議，但點知加咗會之後，轉個頭尋日又話取消會議，究竟搞邊科？
問番盧偉國，佢就話其實係夠法定人數嘅，但因為聽番啲出席唔到會議嘅委員話，非常關心依家傾嘅兩個議題，包括科學館、歷史博物館同體育學院擴建工程，同埋超過二百億元撥款嘅醫院擴建計劃，話好想參與討論，於是佢同副主席莫乃光傾過後，就決定取消呢次會議，等大家下次可以參與討論。
另考慮到近日議員好忙
盧又笑住話，另一方面都考慮到近日議員都好忙碌，好似內會打大交咁，議員都好辛苦喎。但工務小組塞晒車，擔唔擔心好多工程又押後呀？佢就解釋，其實財會近日討論向海洋公園撥款五十四億元作救亡，都用咗唔少時間，財會都處於塞緊車狀態，就算工務小組過到，睇怕都有排先上到財會o架啦！
卓妮