中環出更：響應禁食活動 劉仲恒信明天會更好
香港近年嘅局勢令人憂心忡忡，但仍有人嘗試喺陰霾當中尋覓正能量。扶貧委員會委員劉仲恒（Kevin）話受一連串嘅社會事件同疫情困擾，負面情緒瀰漫全城。而佢就同太太馬露明將響應今個月尾一個為期三日嘅「全城禁食禱告」活動，藉此反思自己並祈求造物主嘅寬恕，以及眷顧我城。
Kevin話今次「禁食」，由於太太現正懷孕，所以期間只係禁飲咖啡，而佢就唔食固體食物，只靠湯水去填肚。雖然禁食邊種食物係按自己嘅選擇，但原則上係要對自己容易沉溺嘅事物，予以節制或戒除，所以唔單止飲食，連生活上某啲習慣，譬如沉迷網絡，都可以視為禁止之列。Kevin話若果口腹之欲都能夠得到節制，精神上自然攀至另一層次，看待世事可更為豁達。佢又透露太太嘅預產期係今年十月，佢相信到時香港嘅情況，一定會較今日更好。
許華傑幫襯小店打氣
不過，日前卓妮見到香港中華出入口商會副會長許華傑（Michael），就同幾個朋友開大餐，佢話疫情爆發近四個月以嚟，呢次都只係第一次同咁多朋友坐埋一齊。Michael話依家市道好差，好多小店都頂唔順，所以佢哋特登去咗一間四川小食店食飯，以示支持。隨住多國嘅防疫措施有所放寬，佢話呢排經濟都叫做有番啲起色，希望啲訂單逐步增加，仲話最重要係視乎中美貿易戰發展成點，因為兩國市場好大，對香港經濟點都有影響。
在座嘅九龍總商會副理事長李豐年就話求賺錢已成奢望，求生存先至係現實嘅寫照！佢話喺咁艱難嘅環境下就更加要抽時間同各方友好聚首，互相交流同砥礪，分享一下逆市經營嘅心得。此外，最好就係做吓義工，能夠為有需要嘅人提供協助，自我感覺會特別良好。
卓妮