政情：11高官為馬會會員 許正宇北京會籍費44萬
政府官員擁有唔少高級私人會所會籍，特首林鄭月娥同三司十三局共十七人中，就有多達十一人擁有賽馬會會籍。其中上任近一個月、曾任職駐京辦政務主任嘅財經事務及庫務局局長許正宇係北京香港賽馬會全費會員，入會費更高達四十萬人民幣（約四十四萬三千萬港元），月費就要一千九百元人民幣（約二千港元）。
做咗北京香港賽馬會全費會員，有乜着數？許可以使用北京會所設施，同埋喺互惠安排之下，使用香港部分指定嘅會員設施，例如可全年使用馬場入面嘅設施，佢亦係唯一一位享有呢個身份嘅問責官員。
根據行政會議成員個人利益登記冊資料，林鄭同時身兼賽馬會贊助人及會員，財政司司長陳茂波為賽馬會遴選會員，而民望長期「墊司底」、被嘲為「避政司司長」嘅律政司司長鄭若驊係賽馬會會員。
13局長8人有會籍
喺十三名局長中，連同許正宇在內，共有八人擁有賽馬會會籍，包括轉職同履新近一個月嘅公務員事務局局長聶德權，仲有民政事務局局長徐英偉、運輸及房屋局局長陳帆同食物及衞生局局長陳肇始同屬賽馬會全費會員。發展局局長黃偉綸同教育局局長楊潤雄則係賽馬會會員，而商務及經濟發展局局長邱騰華則為賽馬會遴選會員。