中環出更：陳建強：早就向梁家榮提節目意見
通訊事務管理局接連就香港電台嘅節目發出警告。港台顧問委員會主席陳建強尋日同商務及經濟發展局局長邱騰華會面，話委員會委員一致認同通訊局的裁決理據。陳仲話早前已向廣播處長梁家榮就節目標準同編輯方針提出意見，梁當時話唔使擔心，但係結果同委員會嘅期望有誤差。
「結果同期望有誤差」
陳話喺會議中只係同邱騰華就《約章》進行清晰交流，委員會嘅意見同局方一致，即港台製作嘅節目需持平觀點及分析。佢強調會議中討論嘅內容並無涉及港台人事問題，只係討論節目同工作的大體方向。被問到梁家榮點解冇出席會議，陳話係邱負責邀請出席人士，但強調討論期間並無評價梁嘅缺失問題，而委員會喺下周五會同梁見面。
對於會面冇邀請梁家榮，被質疑係咪架空梁嘅職務，邱騰華回應時否認，又解釋今次係非正式會面，如果係正式會面嘅話，梁當然會獲邀出席。邱重申委員會有責任協助港台履行職責，並符合有關約章，又透露，委員會向其表達十分關注港台近日多次違反通訊局的規例，亦支持採取相關措施，避免重蹈覆轍。
卓妮