中環出更：網上傳授美甲 鄒圳麗唔怕影響客源
禁聚令終於有所放寬，好朋友當然要聚一聚啦！善德基金會董事局幾位成員日前就到恒昌順文化養生中心飲茶聊天，分享避疫期間嘅生活點滴，主席董吳玲玲，同總理王陳鴛鴦，就分別提供陳年茶葉同老婆餅供大家享用。總理鄒圳麗（Amy）從事美甲行業，佢話美容院早前應政府要求停業，期限一再延長，美甲師難以喺店內為客人提供美甲服務，於是佢就利用網絡資源，教導客人美甲嘅技巧。
Amy話按一般人嘅指甲生長速度，喺禁聚令實施頭兩星期，gel甲嘅效果還可以保持，但再過多兩個星期，就好難唔去美甲啦。因此有關美甲嘅hashtag可以登上instagram頭五位，可見一眾姊妹對美甲嘅需求甚殷，而指導女士如何美甲嘅網上教程，就可謂適逢其會。不過俗語都有話「教識徒弟無師傅」，當女士都懂得自我美甲，美甲師嘅客路豈不是大減？Amy就話未必，因為美甲工夫需反覆訓練，至於為指甲上塗料，屏幕上就好難表現揸筆應有嘅角度同力度，況且大多數人嘅左手，靈活度同右手差好遠。要十指都有均稱嘅妝容，最好都係幫襯美甲師啦。
副主席蕭何元鳳，就依靠網絡嚟度過居家避疫嘅漫長時光，兼且學懂炮製糖醋肉排呢門淮揚菜式，家人品嘗過後都讚不絕口。至於上網煲劇，蕭太不期然想起過往嘅錄影帶出租店，雖盛極一時但最終都遭到淘汰，可見做生意真係要懂得與時俱進。
王亞明：網購時代更要講質素
另一位副主席王亞明經營家具業務，佢話呢排嘅生意，好依賴網上銷售。不過喺網上售賣家具，無得觸摸或試坐，咁又點樣吸引消費者購買呢？佢話要得到顧客嘅青睞，關鍵在於品牌予人信心。所以喺網購時代，更加要講求產品嘅質素。
卓妮