政情：掟錢搞公關 收七份標書 新聞處鼓舞得太早
政府舊年為「香港重新出發」項目招標，但被八間國際公司拒絕。項目今年四月再度公開招標，旨在向海外對象宣傳香港經濟復甦嘅步伐，以及政府如何應對國際共同關注嘅事，話畀大家聽香港一如既往都仲係一個好客、開放嘅營商之都嘅訊息。之前已經有公關工會批評政府「公關手段淪為幌子、無助化解政治危機」，尋日政府新聞處宣布截至上周五，一共收到七份標書。不過啱啱先收到標書，政府唔好開心得咁早啊！
政府新聞處尋日發稿話一共收到七份標書，現正對每份標書進行合規檢查，符合資格嘅投標者會獲邀介紹其建議書。新聞處又表示，佢哋對今次招標嘅反應感到鼓舞。
工會轟未正視問題所在
香港公關及傳訊業總工會早前就鬧爆政府，話公關唔係萬能，政府為項目招標都唔能夠挽回國際形象，仲大鬧政府從未正視問題癥結添！不過政府由四月到五月十五日截止都淨係收到七分標書，十畫都未有一撇，咁快就「感到鼓舞」？如果政府表現好，都唔使畀咁多錢搵人宣傳啦！睇嚟舊年八月上任嘅新聞處處長鄭偉源都係要審視吓政府嘅公關策略先得喇。