中環出更：攜手步出疫境 陳昭昭：旅遊氣泡值得試
為防疫情蔓延，各地嘅旅遊同商務往來都大受阻礙。經常出入內地嘅香港中山社團總會會長陳昭昭，就因嚴格檢疫措施同入境限制，冇得返中山探望親友之餘，亦無法同客人去睇樓，以致佢所經營嘅房地產生意，農曆新年後至今，幾乎全無業績可言！雖然生意係受到影響，但對於限制措施佢只能話理解，畢竟健康重要過賺錢。
除咗有親友喺內地，陳昭昭嘅爸爸由於喺柬埔寨做生意，兩父女已經好耐冇見面喇。儘管可以透過網絡交談，但始終都唔及得面對面咁好。對於有地方開始試行「旅遊氣泡」，即係幾個疫情受控同防疫措施相近嘅國家，互相開放邊界恢復交通往來，陳昭昭話值得嘗試，佢認為香港可以先由澳門開始，逐步將「旅遊氣泡」擴大至珠三角以至部分東南亞國家，若果連柬埔寨都包括在內就最好喇。佢話目前柬埔寨嘅疫情相對輕微，而下個月就係父親節，希望屆時可以有機會同爸爸團聚咁話。
譚姜美珠：澳洲鄰舍關係密切
博愛醫院前主席譚姜美珠，原定二月尾飛去澳洲，但礙於抵埗之後要隔離兩星期，惟有留喺香港靜待疫情嘅發展。譚太憶述昔日「沙士」期間，夫婿譚立仁由香港飛往澳洲避疫，為免鄰居萌生病毒傳染嘅顧慮，甫抵達當地寓所，就要由後院入屋並立即走去浴室淋浴，足不出戶個多星期之後，鄰居先至大呼「Welcome Back！」譚太話澳洲嘅鄰舍關係好密切，當佢要離開寓所一段時日，鄰居就會幫手睇屋，因此佢返到去澳洲有冇接受隔離，根本逃唔過左鄰右里嘅耳目。
香港鐘表業總會前副會長徐珊雯，疫情爆發之後就一直逗留喺澳洲墨爾本。佢話當地因防疫措施而導致消費活動大減，經濟狀況好差，好多人都想到外邊抖吓氣，所以每逢天朗氣清嘅日子，街上面就會好多人。
卓妮