政情：黃偉綸阻人上樓 盧偉國拍枱鬧爆

政府在二○一七年中邀請房協，以兩幅分別位於元朗大欖及沙田水泉澳嘅郊野公園邊陲地帶，合共超過四十公頃土地，進行能否發展公屋嘅可行性研究。去到一八年四月，房協宣布已經委聘顧問展開生態評估同建屋可行性研究，盧話當時社會氣氛正面，因為本港真係好唔夠地，而香港一直靠填海同開山增加土地供應。不過，有關研究進行咗差唔多一年，到一九年二月時，政府以決定採納「土地供應專責小組」建議為理由，叫停房協呢項研究。

盧直言對政府做法非常不滿，感到莫名其妙同非常遺憾。盧話，有關研究又唔係要政府出錢，而且房協都研究咗差唔多一年，究竟郊野公園邊陲地能否興建公屋仍然係一個未知數。加上即使研究結果出爐，政府都會作進一步諮詢畀公眾參與，既然係咁點解唔畀房協做埋個研究先呢？

斥街站派「點心紙」調查唔科學

盧亦唔同意政府單以土地供應專責小組擺街站嘅「點心紙」調查方式，嚟決定咁重大嘅土地房屋政策，認為只用選擇題收集市民意見好唔科學。盧又指，政府施政應該要有前瞻性，推動政策過程往往係先經過政府研究，再帶新思維畀市民，好似土地發展呢啲咁複雜嘅問題更加唔應該簡單化。

盧透露曾與發展局局長黃偉綸會面時講起件事，仲嬲到拍枱問黃點解要終止個研究，盧都認自己對政府嘅批評好嚴厲。不過，黃當時無承諾過會重啟研究，但盧相信黃都明白佢講緊嘅問題，可惜政府已經叫停研究項目。

接壤地方已開發 籲重啟計劃

盧偉國強調會繼續提倡重啟研究，話呢兩幅土地接壤地方已經開發，特別係水泉澳邨已經有多幢公屋，亦有交通配套，好多基層組織都好支持繼續建屋。如果研究結果顯示該處能夠增加建屋土地，排隊輪候公屋嘅市民可以盡快上樓，盧相信市民都會額手稱慶。

盧形容自己係「保市民黨」，堅持「是其是、非其非、保民生」，促請政府重啟呢項研究，以實際行動找出各種可以增加房屋供應嘅方法，縮短市民輪候公屋嘅時間。