中環出更：區會被譏鬥獸場 徐英偉竟當遊樂場
今屆區議會由民主派主導，換屆唔夠五個月經已上演連番鬧劇，早前更有民主派區議員涉「禁錮」民政事務專員，最終報警收場。新上任民政事務局局長近三個星期嘅徐英偉，尋日喺電台節目話，唔認同有人指區議會係鬥獸場，反形容區議會係遊樂場，只要遵守規矩，就能夠玩得好開心。不過，佢呢番言論就引來部分區議員不滿，認為唔尊重區議會。
依法辦事 勿將公僕當磨心
葵青區議會副主席張文龍批評，徐英偉將莊嚴嘅區議會比喻為遊樂場所並不恰當，又指遊樂場規矩係為咗保障使用者嘅自由同安全，質疑徐若希望為區議會設限制，應比喻為「監獄」。觀塘區議員柯創盛就話，區議會「轉莊」後開會有時會偏離議事規則，相信徐今次係對反對派議員作善意提醒，望區議會論政時能夠有規有矩，先能夠造福市民。
徐英偉喺節目上又話，對於有個別區議會因為政治理念而拒批涉及民生撥款嘅項目感到可惜，而對於日前中西區民政事務處，拒絕向中西區區議會轄下嘅政制及保安事務委員會提供服務，徐話民政事務處嘅公務員要依法服務區議會，喺處理議程時會按需要諮詢有關部門，包括律政司，而區議員就唔應該將佢哋當作磨心，迫使佢哋違法，重申當局會按規矩及依法辦事，當中並無分背景同理念。
卓妮