中環出更：避疫走去耕田 侯志強：身體紮實咗
停止社交接觸，改為居家工作、開會同學習，雖然係有效嘅避疫途徑，但活動量不足兼成日坐喺度，隨時走咗個大肚腩出嚟！上水鄉事委員會主席侯志強，就話疫情期間少咗應酬，但運動量反而多咗，因為呢排佢走去耕田，身體仲紮實咗添。
侯志強話早前搵咗塊荒廢農地，面積都有成三十萬呎，於是佢搵埋幾位夥計，一齊從事務農嘅工作，加上自己不時會跳吓繩，既可強化自己嘅心肺功能，又可以促進近新陳代謝。由於按時按刻就返屋企食晚飯，搞到太太都問佢係咪轉咗死性！佢話每日過住起居作息都好有規律嘅田園生活，真係想肥都好難o架。
廖書蘭執屋 睹物思故人
鄉議局執委廖書蘭，就話呢段時間反正都係宅在家，倒不如將自己化身為「執屋達人」，用盡洪荒之力去幫間屋徹底大掃除，佢話計起上嚟，差不多有廿年冇試過親手捐窿捐罅咁去清理家居，結果就畀佢發現一啲經已遺忘，但好有紀念價值嘅物件，正所謂睹舊物，思故人。佢話搵番一支廿年前某位好朋友送畀佢嘅墨水筆，如今雖重見天日，不過支筆嘅墨水已經乾涸。另外仲有一支玫瑰花，係昔日拍拖時男朋友所送贈，其後佢將呢支玫瑰製成乾花收藏盒內，但當攞出嚟睇嘅時候，一拎上手成支花碎晒，嗰一刻令佢突然感悟到，世間冇嘢係可以永恒。
靚女珠寶設計師，金紫荊女企業家協會執行委員莊莎娜，向來都鍾意喺屋企一邊睇電影一邊食零食，但鑑於呢排成日匿喺屋企，長此下去都唔係辦法，所以佢決定唔買零食。
佢下定決心忍吓口之餘，有時間就約埋朋友上網一齊跳吓舞，又或者喺屋企彈吓鋼琴，實行動靜皆宜，咁就可以keep好自己身體，難怪大家都讚佢身材夠苗條啦！
卓妮