政情：施榮怡籲抵制攬炒 盼香港回復安寧
喺舊年六月爆發嘅反修例衝突至今仍然未平息，社會上充斥着攬炒嘅心態，甚至立法會內嘅泛民主派亦被炮轟政治攬炒，內務委員會逾半年仍未選到正副主席。香港中華總商會常務會董施榮怡亦呼籲社會抵制「攬炒」，期待香港回復安寧。
懷念真正嘅獅子山精神
施榮怡早前出席一個活動，佢憶起自己年幼時光，話自己都係來自基層，兒時屋企冇電視，要畀一毫子先睇到電視，於是同幾個細佬晏晝睇完，夜晚食完飯又過隔籬屋再睇過，而媽媽就做手作加工，佢話當年好多家庭都係咁生活，而港人好拚搏，真係好懷念呢種真正嘅香港精神，亦都係獅子山精神。
面對社會動盪同疫情嘅打擊，佢形容呢個係非常特別嘅時期，希望香港人能夠共度時艱，又話攬炒對香港一啲好處都冇，希望大家能夠幫多啲弱勢社群咁話。