政情：新冠肺炎僅算演習 林超英：氣候災難可殺幾億人
新冠肺炎疫情全球爆發，各地政府都想方設法，力圖將呢場世紀疫情嘅影響減到最低。之不過，天文台前台長林超英尋日就喺電台節目中，形容今次疫情同氣候災難相比，只係一次小型演習，佢呼籲各地政府要及早籌謀，做好應對行動，唔好見到棺材先識流眼淚！
社會冇餘力應對突發情況
林超英強調大自然能夠提供食物養育人類，但疾病同自然災害同時會傷害人類，特別係近半世紀人類嘅偏差行為，例如不當干擾動物世界，導致出現混合唔同動物基因嘅新型病毒。不過，佢認為由人類造成嘅全球暖化先係更大嘅災難，甚至可能引致數以億計人類死亡。
點解會將疫情同氣候變化拉埋一齊嚟講？佢話現代社會運行嘅各個環節，好多時都只會設計到啱啱好，唔會留有餘地去應付突發情況，結果喺今次疫情中，全球防疫物資供應鏈斷裂，有個別國家嘅醫療系統因而崩潰。
佢又話氣候變化下全球糧食將會減產，呼籲政府未來必須確保有足夠食物供應，又擔心疫情過後嘅報復式消費同旅遊會排放更多二氧化碳，提醒港府要推行全港減碳措施，同做好防災基建！