政情：慶祝母親節 陳凱欣炮製古早蛋糕
今日係母親節，好多人諗緊送啲咩畀媽咪做禮物。議員陳凱欣就有好推介，尋晚佢喺社交平台拍片，教大家整一個唔使焗爐，用電飯煲就整到嘅古早蜂蜜蛋糕，陳凱欣話無論送咩禮物都係一份心意，相信大家經過今次疫情之後都知道健康最重要，所以祝天下間嘅母親身體健康。
電飯煲就整到
炮製呢個蛋糕所需要嘅主要材料就梗係雞蛋同低筋麵粉喇、除此之外亦要準備牛奶、菜油、適量嘅沙糖同白醋。陳凱欣話要先打蛋，分開蛋黃同蛋白，然後分別將牛奶、菜油同蜜糖倒入蛋黃，再將佢哋攪勻。
咁跟住個步驟係咩呢？陳凱欣話就係要將麵粉分兩次篩，再將麵粉同蛋黃攪勻，之後將白醋加入蛋白，落完沙糖再用打蛋器打到起泡，分三次將蛋白霜放入已經攪勻嘅蛋黃，再輕輕攪勻，倒入電飯煲再戥至平滑，最後將電飯煲較為煮飯模式，焗大約四十分鐘，再隨意加上自己鍾意嘅裝飾就大功告成喇！