政情：梁美芬拍片教整抗疫沙律

梁喺片中就講到，話疫情下好多人都留在家中冇運動，谷到肥晒，好多人擔心腸胃出現問題，佢同賴冬妮都推薦三寶沙律菜，話可以消炎瘦肚，仲特意去到街市準備材料，所需材料有蘋果、青木瓜同椰菜，好容易買到，加埋都唔使三十元，而且營養非常豐富！

用白米醋洗菜可殺菌

兩人隨即落手落腳自己整，佢話製作上有啲細節要留意，原來洗菜唔好用鹽，反而要用白米醋，因為醋可以殺死蔬果表面微生物同細菌。而椰菜就有豐富嘅維他命K，幫助活化造骨細胞，製造鈣質防止骨質疏鬆，仲可以喺小腸中吸收膽固醇，排出體外，不過就要記得生食。

至於蘋果就要連皮一齊食，青木瓜則有助降低炎症，佢又建議大家仲可以配搭唔同嘅餸菜一齊食添，有時間就試吓跟住整啦！