政情：檢控慢吞吞 黑暴勢重臨 學者促撤鄭若驊

鄭若驊以《潔身自愛、遠離暴力》為題發表網誌，內文提到最近警方搜獲一批爆炸品同化學品，假如被不法分子利用，後果不堪設想。佢估計，有人誤以為暴力手段可以達到目的，但任何違法行為最終都會帶來法律後果，又話有人誤以為年輕人犯罪只會被警司警誡，唔會留案底，但警方衡量係咪作出警司警誡時，需要考慮佢哋犯案時係咪未成年、所犯罪行嘅嚴重程度同係咪有悔意等，並唔係所有犯案青少年都符合警司警誡嘅條件。

對於部分未成年嘅青少年或學生有份參與違法活動，甚至作出暴力行徑，佢話情況令人擔憂，又話佢哋唔單止有機會危及自己或別人嘅人身安全，更會被拘捕同檢控，一旦罪名成立，就會留有案底，必定影響日後升學及就業，又呼籲年輕人要建立獨立思考同判斷能力，凡事三思而後行，唔應該隨便以身試法，因一個錯誤決定足以摧毀一生。

提及有意見認為應向年輕犯案者撤銷控罪，佢強調律政司會嚴格按照證據、適用法律同《檢控守則》作出檢控決定，絕不能單靠犯案者年齡作決定。

匿喺鍵盤世界 離地冇膽

老實講，鄭若驊過往不但醜聞纏身，更被批評「應告唔告」，令本港法治淪亡，而佢又唔做好自己份工，明明有責任解釋法律條文，但就經常迴避，過往多次解釋檢控政策或推銷新計劃都只係喺網誌講，早就被鬧爆龜縮喺屋企做鍵盤戰士，更被直斥「離地」又「冇膽」。依家既然講到咁關心年輕人參與暴力嘅問題，又要為檢控政策解畫，竟然又再繼續匿埋做鍵盤戰士，唔親身出嚟解釋，令人質疑佢究竟有幾分真心關心年輕人？

隔半年始起訴 冇阻嚇力

理工大學專業及持續教育學院講師陳偉強直指律政司檢控程序過慢，以壹傳媒黎智英被捕一事為例，事隔多年先提出起訴，「其實一兩個星期已經可以搜集證據拉人」，又舉例指理大衝突一事發生於去年十一月，惟事隔近半年先至開始起訴，明顯沒法阻嚇年輕人參與違法活動，恐造成今年六月再現暴力示威嘅隱患。

政府早前出現人事變動，多名高官換人。陳認為鄭若驊力有不逮，能力不足，促請政港府實是求事，撤換鄭若驊。