中環出更：陸頌雄爆內幕 何啟明被老婆罰「跪玻璃」
近期個個政界人士都爭相做KOL，仲會為自己起朵。好似勞工界議員陸頌雄就自稱「醬爆」，其黨友何啟明就自詡「觀塘梁朝偉」，醬爆仲大爆觀塘梁朝偉成日喺屋企被罰跪玻璃。唔通呢個唔似梁朝偉嘅觀塘梁朝偉做咗啲乜嘢對唔住老婆？
佢哋搞邊科？原來係一齊玩「打工仔常識問答爭霸戰」，仲分成兩隊對決添！話晒佢哋係勞工界代表，玩呢個爭霸戰可以話冇難度，仲乘機催促立法會人力事務委員會快啲開會，早日通過延長法定產假至十四周同僱主接納懷孕僱員因產檢缺勤而有權獲得疾病津貼嘅《二○一九年僱傭（修訂）條例草案》。之但係，佢哋喺生活常識方面就差啲嘞！喺答「洗手七式」同「開門五件事」時都答到錯晒。
議會內講老婆餵人奶
話明係「爭霸戰」，以四比八不敵醬爆嘅觀塘梁朝偉當然要接受大懲罰啦。做咗同事咁多年，梗係知道好多對方不為人知嘅一面，醬爆大爆觀塘梁朝偉成日喺議會公開講阿嫂餵人奶嘅事，仲成日返到屋企畀阿嫂罰跪玻璃。
觀塘梁朝偉就唔認要跪玻璃喇，但都差唔多啦，佢話要成日跪keyboard（鍵盤）就真。不過佢都乘機寸吓本港嘅餵哺母乳設施不足，覺得如果香港嘅商場同工作環境對餵人奶友善啲嘅話，佢就唔使成日喺議會攞老婆啲私隱嚟講，當係例子畀建議啦！
卓妮