中環出更：湊B急唔嚟 陳李妮：做咗媽媽更有耐性
今日就係母親節，唔少人都會趁住呢個機會，向辛勞嘅媽媽表達敬意。早兩年生咗個囡囡嘅博愛醫院前主席陳李妮（Lily）就話，身邊有唔少朋友都覺得佢做咗媽媽之後更有耐性，提到自己以前習慣咗做嘢節奏好趕急，但湊BB時好多嘢都急唔嚟，仲話自己見到BB喊到停唔到時，都希望可以親自抱住BB呵番佢，搞到請番嚟嘅陪月同姊妹講電話時，笑言自己係嚟度假添！
Lily又講起自己細細個嗰陣，媽媽去街市買餸時會叫佢一齊去幫手拎，喺屋企煮飯時又會叫埋佢入廚房觀摩，同埋幫手做簡單嘅工作譬如切食材，結果潛而默化令到佢愛上咗煮嘢食。佢仲話，近排多咗時間留喺屋企做「廚神」，但因為煮嘢食嘅頻率比以前更密，所以要上網搵吓靈感煮啲新菜式咁話喎。
孫蔡吐媚：仔女每年送DIY相架
轉頭就見到仁濟醫院副主席孫蔡吐媚（Mary）同埋丈夫孫少文，作為四個仔女媽媽嘅Mary就話，佢哋今日中午就會成班仔女一齊出街食飯慶祝。Mary仲話，佢哋每一年都會自製相架送畀自己，收到之後就覺得好窩心，雖然收到嘅相架冇一百個咁多，但都有好幾十個，所以平時都展示唔到咁多出嚟，就將部分放咗喺藏畫室內。
查實呢排除咗有好多孝順仔女會親手整禮物外，最近亦都有唔少市民選擇留喺屋企整吓嘢食，早前更出現麵粉、酵母等烘焙相關嘅食材賣到斷市嘅情況。本身做開電器代理業務嘅港九電器商聯會主席蒙德揚就話，雖然近期經濟唔係太好，好多市民都減少購物同消費，不過近來多咗人喺屋企整嘢食，特別係整吓蛋糕、麵包咁，所以打蛋器嘅銷路大升，由以往一個月只係賣二、三百個，去到依家一個星期可以賣出成千個，甚至清空晒成個貨倉嘅存貨添！
卓妮