政情：張華峰 李小加回味「兩強大戰」
港交所日前宣布季度業績嘅同時，仲公布行政總裁李小加明年十月底約滿時將唔再續約。金融服務界、經民聯議員張華峰尋日就喺社交網站Facebook，上載與李小加踢波嘅片段，話係「峰加大戰」，只可惜此戲碼難再，惟有睇片重溫咁話，睇片都感覺到嗰股熱誠，同體育精神嘞！
社交網上載5年前足球賽
原來呢場賽事係五年前，張華峰同李小加喺南華會足球場，展開一場「星級足球大戰」，片中仲提到，李小加係「世界級猛虎射球」，而張華峰就係「亞洲紙板鋼門」，兩個人都可以話係全副裝備上場o架，運動衫、運動褲、波鞋甚至手套，分兩隊對決。
首先由李小加守龍門，張華峰則距離九碼射出，但經過兩次都唔成功，於是縮短距離改為六碼，最終都係唔成功，引得大家哄然大笑。輪到李小加上場，射十二碼，一球致勝，真係厲害。睇嚟張華峰唔捨得呢位好朋友即將離開港交所，特意搵番呢條片回味一下。