政情：內會爆衝突 陳婉嫻囑保安小心
立法會內務委員會（內會）尋日朝早召開嘅第十七次會議，又再選唔到主席。由於泛民主派同建制派互不相讓，況且之前喺處理修訂《逃犯條例》時，負責審議條例草案嘅法案委員會鬧出「雙胞胎」，繼而發生肢體碰撞，甚至有人受傷。前議員陳婉嫻（嫻姐）都話非常擔心，佢尋日都有特登返去立法會大樓探望保安人員，叮囑佢哋要萬事小心、注意安全，又話非常擔心肢體衝突事件會一再重演。
爭議拖半年 稱接受唔到
嫻姐仲話自己二十年嘅議員生涯都試過處理選主席事宜，覺得依家超過半年都未搞掂，「我就接受唔到喇」。嫻姐覺得，如果事件一路拖落去都解決唔到，好可能最後都要中聯辦或者港澳辦出手都未定，但首先立法會主席梁君彥都應該盡力調解呢次風波。之不過面對呢個棘手局面，嫻姐都話冇解，只能祈求天佑香港咁喎。不過擔心都冇用，要發生嘅總會發生，兩邊陣營霸位嘞！