中環出更：四新局長申報利益 曾國衞喺香港無殼
四位新上任嘅局長，其個人利益申報尋日曝光。政制及內地事務局局長曾國衞係當中唯一喺香港「無殼」，即係無物業嘅新局長，但佢就喺東莞擁有一個自用的住宅物業。至於財經事務及庫務局局長許正宇可謂係新局長當中嘅樓王，事關佢同屋企人喺香港同海外合共擁有六個物業。
許正宇擁六物業成樓王
創新及科技局局長薛永恒喺香港有「殼」，佢申報喺觀塘有住宅單位，而呢個單位作出租用途，由佢太太同家人共同擁有。
至於民政事務局局長徐英偉就申報咗三個物業同兩個車位，兩個深水埗嘅物業，其中一作自用嘅係佢太太擁有，而另一個作出租用途嘅就係佢擁有百分百嘅業權，而兩個車位亦係佢太太擁有，而佢申報喺加拿大有住宅物業，係供家庭成員居住，佢與家人各佔一半業權。
許正宇申報咗六個物業，喺香港佔四個，當中三個喺灣仔，其中一個出租用途嘅單位係佢全資擁有，另一個住宅單位係連車位，亦係作出租用途，但就係佢同家人共同擁有，各佔百分之五十權益，而餘下一個住宅單位連車位嘅物業就供家人居住，亦係佢同家人共同擁有嘅，各佔百分之五十權益，而喺中西區有一個住宅單位連車位嘅物業作為自住，有關物業係佢太太全資擁有。
另外，佢亦申報咗喺澳洲住宅單位連車位嘅物業，用作出租用途，有關物業係佢太太全資擁有，而喺杭州亦有住宅物業作自用，亦係太太全資擁有。
卓妮