政情：「地球日」五十周年 黃錦星梁榮武拍片籲減排
適逢「世界地球日」五十周年，環境局局長黃錦星日前就相約香港氣象學會發言人梁榮武一齊拍片，更上載喺Facebook，話今年世界地球日有雙重意義，大家同心抗疫，以健康為本，但應對氣候變化，亦都刻不容緩，仲話地球健康關乎人類健康，低碳轉型，絕對係全球大勢所趨。
促各界合作 及早應對氣候變化
片中兩人講到氣候變化令世界上天災頻繁，如澳洲山火、歐洲熱浪，乾旱等極端天氣等，港人絕對要關注氣候變化，加上近年平均熱夜數字不斷增加，預計世紀中期會增至八十天，後果不堪設想。而根據本港近年人均碳排放，一四年已「達峰」，超過六公噸，近年開始有下降趨勢，希望將來喺交通、樓宇及發電等方面繼續減少碳排放。
佢哋建議市民減少開冷氣、推廣素食、支持環保新能源車輛及渡輪等，而政府、業界及市民三方面共同合作，以達到減少碳排放，梁榮武仲話對抗氣候變化，就好似當下抗疫，要全民及早應對，一齊進行低碳生活，最後仲推薦市民使用「低碳生活計算機」，計算大家日常嘅碳排放量。