政情：陳家強：要有心理準備 迎接經濟調整期
疫情重挫各行各業，到底香港經濟將會何去何從，前財經事務及庫務局局長陳家強，喺一個訪談節目中認為世上冇人有水晶球，可以預測整個疫情危機最終係如何解決。不過佢就認為港人要有心理準備，可能要經歷經濟調整期，且過程仲會係幾痛苦添。
指冇可能旨意政府
陳家強話香港租金昂貴，倘欠缺入境旅客的話，單靠本地消費實在難以支持，而租金回落，短期內係令人感覺好痛，不過長遠而言，則令到香港經濟有更好嘅平衡。佢又話儘管政府推出措施挽救疲弱嘅經濟，但只可以幫到本地企業嘅現金流，由於疫情唔會咁快完結，可能仲要維持一段頗為漫長嘅日子，因此旨意政府資金去挽救經濟係無可能。政府嘅支援並唔能夠撐住所有行業，不過都應該預留彈藥幫助中小企，否則一旦出現裁員或結業潮，對社會嘅影響會更大。雖然政府動用儲備必須審慎，不過按目前環境，佢認為寧願使多啲，好過使少啲咁話。