中環出更：不滿有人扭曲歷史 何俊賢挺身糾正
早前有小學教師將鴉片戰爭嘅歷史扭曲，引起唔少家長不滿。雖然校方承認部分內容不正確，又向家長發通告，不過唔少議員都對事件感到不滿，其中漁農界議員何俊賢（高佬賢）仲鬧爆涉事教師係「廢師」，而且仲拍片同網民講解番鴉片戰爭嘅歷史。
之前網上流傳咗段短片，係關於慈雲山一間小學嘅常識科教師用旁述講解鴉片戰爭，當中就話因為中國有好多人食煙草，所以英國以禁煙為由，為咗消滅鴉片而向中國發動戰爭。高佬賢就認為，涉事教師嘅講法令學生誤以為英國係「為正義而戰」，會影響下一代嘅價值觀。
林健鋒促當局嚴肅跟進
高佬賢日前就拍片講解番鴉片戰爭嘅歷史，仲叫大家讀歷史唔單止要了解過程，仲要理解埋動機，咁先可以明白當時政府點樣對付敵人。對於有資深小學校長認為涉事教師係備課不足，佢認為就算普通市民去教，唔備課都唔會講得出呢啲嘢，質疑「備課不足」有開脫之嫌，仲點名要求教育界議員葉建源就事件回應添。
另外行政會議成員兼商界議員林健鋒都狠批，負責教授歷史嘅教師歪曲歷史，認為做法唔可以接受，會影響學生吸收正確嘅知識。佢就希望，政府當局可以嚴肅跟進事件，切勿「高高舉起，輕輕放下」。連行會成員都咁講，睇嚟政府真係要諗吓點處理，平息事件喇。
卓妮