中環出更：落街運動太多人 周錦威家置跑步機
做運動就如同求學問，必須持之以恒方見成績。家住渣甸山嘅香港五金商業總會監事長周錦威，其居所一帶嘅道路本來係非常理想嘅練跑路線，然而近日「登山避疫」嘅巿民愈來愈多，以致佢一落樓就如置身街巿，摩肩接踵根本難以練跑，健身室又不知何日重新開放，於是佢就買咗一部跑步機返屋企練跑。
能夠容納跑步機，周錦威嘅寓所面積應該都唔細喎。佢就解釋話部跑步機其實係可以摺疊，所佔空間唔算好大，不過論專業程度，就梗係唔及得健身室嘅跑步機啦！所以佢每次使用，都唔敢將速度調得太快，以免摩打不勝負荷。佢又話試過樓下住客曾向佢「溫馨提示」，儘管對方說話委婉，佢都心領神會，從此為跑步機下方加上瑜伽墊，以消除使用期間嘅聲浪。周錦威話至少隔日就練跑一次，每次約莫跑一個鐘，倘若疏於操練，體能真係會退步o架。
鄭錦嬋買划艇機 啱全家用
摩星嶺獅子會第一副會長鄭錦嬋，最近就購置一部划艇機，以便居家避疫亦可勤做運動。佢話划艇機所佔空間的確較大，不過就勝在可以鍛煉手、腰、背等身體不同部位嘅肌肉，同強化心肺功能，兼且容易掌握，一家大細都啱用。雖然室內做運動可不受天氣影響，不過鄭錦嬋認為陽光能促進人體健康，因此戶外運動亦不宜忽略。至於今年好多長跑賽事紛紛告吹，對跑友而言無疑係少咗個目標，但只要相約幾位好友一齊練跑，友儕間嘅砥礪能激起恒常運動嘅熱情。
傑青張寶雯係一間小學嘅副校長，對於持之以恒嘅道理亦深有體會。佢話校內有部分非華裔學生趁停課期間返回家鄉，佢擔心小朋友置身非中文嘅語言環境，若果時日過長的話，可能會弱化運用中文嘅能力，對他朝重返香港生活構成阻礙，所以校方都透過網絡教學，促使千里之外嘅少數族裔學生能夠持續不斷咁去學習，唔好荒廢學業。
卓妮