為鼓勵生育，目前十個星期嘅法定產假將會延長，而新增嗰四星期嘅額外薪酬雖由政府補貼，不過補貼就有上限。然而多位議員都主張落實全薪產假，認為補貼就算不設上限，多出嚟嗰筆額外開支，對香港政府嘅標準嚟講，真係九牛一毛，大海一滴水咁。雖然政府話公帑要審慎運用，而勞工處副處長（勞工事務行政）李寶儀解釋，建議嘅產假補貼，係參考國際勞工公約及其他經濟體系嘅情況。不過香港出生率之低，可謂世間少有，搬其他經濟體系出嚟，又有幾多參考價值呢？
