政情：退任大過天 麥列菲菲停審醫委會聆訊
擔任香港醫務委員會委員多年嘅麥列菲菲，近日正處理一宗涉及一名骨科專科醫生嘅聆訊，不過原定喺尋日展開嘅聆訊就因為法律人員臨時修改控罪而要延期進行。之不過，主持聆訊嘅麥列菲菲就話自己即將退任，擔心先審議部分控罪的話，就會趕唔切喺今年六月底退任前處理，所以決定直接唔開審，留待醫委會再組委員，仲話：「我退任嘅事唔應該被延遲。」唔知道就嚟「無工一身輕」嘅佢，會唔會對冇得處理任內最後一宗聆訊感到可惜呢？
現齡七十八歲嘅麥列菲菲曾經出任過十二年醫委會主席，過去曾經主持過多宗轟動一時嘅醫學聆訊，回歸前更曾獲委任為立法局同行政局成員，亦都擔任過唔少重要公職。佢喺千禧年代初曾出任英基學校協會主席，協助處理其帳目及管理問題。不過，佢喺二○○○年擔任教育統籌局師訓與師資諮詢委員會主席期間，曾強硬推行語文教師基準試，觸發六千名教師上街遊行抗議。
聆訊前夕修改控罪
之但係，久經風浪嘅麥列菲菲都未試過好似今次咁，有法律人員喺聆訊前一晚先走去修改控罪。基於聆訊公平原則，辯方需要更多時間準備，聆訊最快喺五月中先可以繼續，而委員會最快要去到五月十六日先至得閒，擔心會趕唔切退任嘅麥列菲菲就決定直接唔開審喇！