政情：公民講場：政策不濟 滿山垃圾 漁署仍旨意遊人自律

漁農自然護理署自二○一七年起，將郊野公園嘅垃圾桶陸續撤走，改為呼籲遊人「自己垃圾自己帶走」。之不過近來每逢假日，郊野公園都人頭湧湧，連帶垃圾量都隨人潮大增。有議員就促請署方要加派人手清理垃圾，以免郊野公園變成播疫缺口。漁護署助理署長（郊野公園及海岸公園）黎存志就話，署方現已要求籌辦活動嘅機構離開前要清理垃圾，咁即係仍然旨意遊人自行帶走垃圾喇。之不過，「自己垃圾自己帶走」政策都出台咗三年，但依家郊野公園垃圾處處，睇嚟署方喺呢方面嘅公眾宣傳教育成效不足喎。