政情：郭榮鏗不獲續任競委會委員
政府尋日公布競爭事務委員會（競委會）嘅新委員名單。公民黨議員郭榮鏗由二○一八年五月一日起，擔任為期兩年嘅競委會委員，然而尋日被告知將不獲續任，而獲續任嘅十名委員，當時亦與郭一起同時被委任。郭昨發聲明表示，非常榮幸過去能擔任委員，期望競委會能在未來日子繼續捍衞競爭，推動各界了解《競爭條例》，惟未有解釋不獲續任原因。
陳家殷接任主席
政府宣布委任陳家殷為競委會主席，代替擔任主席已經七年嘅胡紅玉，而劉堅能、羅富源、吳永嘉同黃慧群就獲委任為新委員。政府表示，司徒耀煒、孫永泉同郭榮鏗三名委員將離任，當中前兩者曾連任委員，而與郭同期加入競委會嘅陳家強等十人就續任委員。
商務及經濟發展局局長邱騰華表示，感謝即將離任嘅競委會主席胡紅玉，及包括郭在內嘅三名委員。對於新主席嘅任命，邱指陳家殷積極參與公共服務，尤其是推動消費者權益同競爭方面擁有豐富嘅經驗，深信陳可帶領競委會繼續有效執行《競爭條例》，促進香港嘅競爭環境。