政情：西九工程冇時間表 謝偉銓：等到眉毛都白埋

建築、測量、都市規劃及園境界議員謝偉銓直頭話對西九二區發展好失望，批評並冇計劃、大綱同時間表，反而錢就使咗好多、眉毛都白埋都未見完工！西九文化區管理局行政總裁栢志高就話冇地庫乜嘢都做唔到，但地庫仲需要五年先可以使用。民政事務局常任秘書長謝凌潔貞亦「幫拖」，話地庫完工先可以興建上蓋物業喎。

倡協議期加至43年 被斥無理

議員另一個關注點係ACE發展組合嘅進度，但西九文化區管理局首席商務總監陳惠明建議將「建造、營運及移交」協議期加長至四十三年（包括五年建築期和三十八年營運期）以吸引投標者。話音未落，陳被多名議員圍插。議員話協議期太長搞到難以監察進度；亦有議員直斥四十三年協議期差唔多半世紀、簡直不合常理，質疑當協議期結束後政府收番西九文化區，建築物已不合時宜需要拆遷。謝凌潔貞就反駁，話會展第一期都用咗四十年啦，而栢志高亦呼籲議員一定要對計劃有信心咁話喎。