政情：再被爆涉違泊 周偉雄：憑泊車證入閘
過去因違泊而被嘲「周違泊」嘅葵青區議員周偉雄，早前又再涉嫌違泊。據讀者提供嘅照片所見，周嘅座駕停泊喺葵芳邨一處「緊急車輛通道嚴禁車輛停泊」嘅橫額前面，場面頗為諷刺。不過周回覆查詢時，就辯稱自己係憑房屋署發出嘅泊車證入閘，又話「自問一直做嘢循規蹈矩」喎。
話入邨送嘢畀街坊
據悉，當時邨內有充足車位可供停泊，既然係咁點解要亂泊呢？周否認有違泊，又話當時只係入邨送啲嘢畀街坊，好快就離開咗喇。周覺得自己屢次被影到違泊，係有人同佢玩針對。又堅持自己一直做嘢都循規蹈矩，指如果真係有違泊，自然會受到罰款嘅處罰，重申自己唔係貪圖利益同便利嘅人。之不過，既然有泊車證，當時又有大把車位，泊番喺車位咪可以避免惹人誤會囉。