政情：攬炒派滿口歪理 陳健波血壓飆到190
反對派議員喺立法會狂拉布，喺早前財務委員會審議政府第二輪防疫抗疫基金亦唔例外，財委會主席陳健波（波哥）尋日出席一個網台節目時，狠批反對派係攬炒派滿口歪理，激到佢嘅血壓曾經飆升至一百九十呀！
「費事同佢哋嘈」
波哥話做財委會主席，成日聽住班攬炒派講埋啲歪理確實好難頂，吸埋好多負能量，多到要一路開會一路吐番啲負能量出嚟。佢話由於佢其中一個樂趣就係解決問題，偏偏攬炒派去到就嚟表決時就話要提中止待續，激到佢好嬲，直情嬲到發癲咁話添！波哥話攬炒派根本係要撩起佢把火，變相幫手拉布，所以依家佢就忍忍忍，「費事同佢哋嘈」，或者叫秘書將議員不恰當嘅言論記錄在案，以免中計。
喺呢啲狀況下，波哥話試過一返到立法會血壓就升到一百五十至一百六十，佢估開緊會嗰陣應該有成一百九十都嚟緊。嘩！好高呀！佢之前又試過連續幾個禮拜對眼爆血管，有次喺（車立）照鏡嗰陣發現對眼有紅點，夜晚返到屋企真係爆咗微絲血管，於是佢即刻換過晒啲血壓藥，仲話唔會畀啲攬炒派激死佢o架！