政情：議員狙擊撥款草案 港府指全違議規 梁君彥斬近六成修正案

削司局長薪金修正案獲批

根據立法會文件，梁君彥指議員今年提出嘅一百二十四項修正案，就撥款法案而言雖然係八年嚟為數最少嘅一次，但就呻話仍然係太多。而獲批嘅修正案當中，有四十一項涉及四十一個分目，包括削減行政長官辦公室全年開支預算、十八區民政專員薪金開支預算、警務處全年開支預算等。另有十一項屬酌情獲批嘅修正案，主要涉及削減包括被嘲為「避政司司長」嘅律政司司長鄭若驊在內嘅多名司局長全年薪金預算、削減立法會秘書處秘書長同埋法律顧問嘅薪金等。

陳志全提出最多 共43條

梁喺文件中補充話，有四項修正案旨在削減立法會秘書處秘書長或秘書處法律顧問嘅薪金同津貼。為免出現任何利益或角色衝突，已避免秘書處協助處理該等修正案。梁又指，政府話議員所提出嘅修正案全部違反《議事規則》，認為全部都唔應該獲批喎。而十六位提出修正案的議員中，提出最多修正案嘅議員係陳志全，共有四十三條、當中有二十八條獲批、有十五條不獲批，另有數名議員所提出嘅修正案全數獲批。

本身有四條修正案因被裁定為不準確而不能提出。陳志全撤回其中一條，另外三條分別被指「建議嘅削減款額不正確」、「並沒有包括該項目嘅預算」，同「建議嘅削減款額涉及另一分目嘅預算開支」。梁君彥就預留三十六個小時處理相關程序，比舊年三十八個小時少咗兩個小時。修正案嘅處理方式，係將全體委員會同三讀時段分成三個環節，預計於下月十四日完成所有程序同表決。此外，議員舊年共提出一百五十六項修正案，較今年多三十二項。