中環出更：居家學習欠集中 張蕙然：校園生活難取代
停課不停學，透過網絡進行居家教學，似乎係因應疫情嘅理想解決方案。金紫荊女企業家協會執行委員張蕙然（Jennifer），佢嘅一對子女雖透過網絡保持學習進度，不過論學習效果，都係同課堂有分別。佢話小朋友喺屋企對住部電腦，往往會受到家中事物影響，難以保持專注力，所以網上授課完結後，佢都要幫手跟進一下小朋友嘅功課。
雖然子女嘅功課，家長可以從旁督導，但Jennifer認為小朋友喺校園裏面同同學相處嘅社交環境，居家學習難以比擬。加上成長期間嘅小朋友通常都精力過剩，學校嘅體育堂實在不可或缺，如今正值停課期間，家長都相當苦惱如何為小朋友「放電」。Jennifer又話網絡好難重複一班廿幾個學生嘅課堂教學模式，於是網上授課就要分組進行，教師嘅授課時間表就無可避免要有所改動啦！況且教師居家授課，既要應付分為幾組嘅學生，又要兼顧自己家中嘅小朋友，所以網上授課對教師而言，可能較課堂教書更辛苦。
育有四名子女、有蜘蛛媽媽之稱嘅鄭麗莎（Lisa），雖則大仔目前係幼稚園學生，但教師都有進行網上授課，而佢初時因唔熟悉視像程式嘅操作，難免出現蝦碌情況，但幸好問題好快就得到解決。
鄭麗莎：大仔鍾情砌積木
Lisa都覺得小朋友居家學習，好容易因家中事物而分心。然而近來佢發現大仔鍾情於一種有助專注力嘅嗜好，就係砌積木嘞，仲要一埋位就砌兩三個鐘，其聚精會神嘅態度，令人刮目相看咁話。
前南區區議員陳家珮（Judy）同好多家長一樣，打算教識三歲嘅大仔背熟廿六個英文字母。儘管目前還未倒背如流，但大仔對網絡媒體名稱嘅英文讀音就講得字正腔圓，令Judy不得不佩服網絡嘅威力。Judy又話近期疫情雖放緩，但為安全起見唔會帶小朋友落街玩，如果扭計要出街的話，就惟有畀佢去窗台望下街景，聊勝於無咁喇。
卓妮