政情：近月車禍特別多 楊哲安山頂測超速
山頂區早前有野豬出沒，令區內居民好驚，教育局前政治助理、中西區區議員楊哲安（Jeremy）頻頻撲撲，呢排又有另一樣煩惱嘅問題喎。
話說Jeremy日前喺社交平台上載咗幾張相，見到佢企喺路邊揸住支嘢射嚟射去，而駛過嘅車都好快速，睇落都戥佢危險。究竟佢喺度做乜？原來佢揸住嗰支嘢係用嚟探測車輛超速嘅。
Jeremy貼文話山頂啲路又窄而且斜位彎位又多，近年嚟，甚至呢幾個月內已發生多宗唔同程度傷亡嘅交通意外，所以佢就喺山頂道睇吓車輛超速情況，發現唔少車輛落山時嘅車速明顯過高喎，仲話會同運輸署研究唔同嘅方案，睇吓點樣可以保障道路使用者安全。