政情：許華傑童年貪玩 被狼狗咬耳仔
呢排網上興起一個挑戰嘅活動，用嚟踢走消極嘅情緒，而接受挑戰嘅人就要喺廿四小時內上載一張相，香港中華出入口商會副會長許華傑（Michael）就上載咗張細個攬住隻狼狗嘅相，細訴兒時嘅生活點滴。
細個唔係與父母同住
Michael貼文話細個嗰時爸、媽為咗做嘢，根本無時間照顧仔女，而兄弟姐妹從小就分散喺親戚朋友屋企，而Michael就喺外公、外婆度住到九歲。佢話喺嗰段期間，爸媽只係一個禮拜先出現一次，夜晚食完飯就走。
佢話喺七十年代，好多家庭都好似佢屋企咁嘅情況，而後來屋企生活開始有啲改善，阿嫲又喺鄉下嚟咗香港，可以幫手照顧佢哋，先陸陸續續搬番屋企一齊住。
細路仔梗係鍾意玩喇！佢話細個冇乜玩具玩，最鍾意就睇住幾個舅父打band彈結他唱歌，同追住狼狗Tango玩。佢仲爆料話影完張相之後，Tango咬咗佢耳仔一啖呀！吓！冇講有冇睇醫生喎。