政情：市民勿再搞壞世界 林超英籲疫後「重新做人」
喺實施禁聚令同停業令下，好多市民都唔會四圍走，寧願宅在家，自己落廚煮飯同鑽研廚藝。一直關注環保嘅天文台前台長林超英就呼籲大家疫後要「重新做人」，唔好回到過去嘅浪費世界。
指生活本來好簡單
林超英日前喺Facebook貼文，講述呢幾個禮拜留喺屋企嘅生活。佢話真係感到生活本來好簡單，吃喝拉撒，以各種方式同家人、朋友聯繫，得到溫暖嘅人生感覺，間中睇吓窗外嘅天空，或者到附近人少嘅地方行吓，睇吓山、海同樹，同自然連繫，得到心中一點寬鬆，其實就得嘞！唔使日日買新衫，唔使製造無盡嘅垃圾，唔使搭飛機去勻天下旅遊或驚被困郵輪，亦唔使燃燒大量化石燃料。
點解？都係嗰句唔想浪費同破壞生態環境嘛！林超英仲話財富在心中，開心也在心中，唔好回去過去嘅浪費世界，呼籲市民喺走出疫境後，千祈唔好回到原來搞壞世界嘅狀態，必須「重新做人」，唔能夠再以破壞氣候同生態嘅方式生活咁話。