中環出更：滙豐將檢討派息 張華峰：咪當港人係傻仔
滙豐控股早前宣布取消派息，引起大批小股民強烈不滿，連日嚟更有人到中環滙豐總行示威抗議。滙豐日前表示會喺公布二○二○年全年業績或之前重新檢討派息政策，但金融服務界議員張華峰（肥老闆）尋日喺Facebook（Fb）上貼文，質疑滙豐嘅檢討結果，仲鬧爆滙豐咪當港人係傻仔！
滙豐喺三月底應英國審慎監管局要求，取消派發去年第四次中期股息，並會喺今年底前暫停派發普通股嘅季度或中期股息，引發本港大量持貨散戶強烈不滿。肥老闆喺Fb貼文講呢件事，話滙豐或重新檢討派息，批評「講咁多耶穌做乜」？
憂滙豐只諗「還唔還番啲」
肥老闆形容成件事好似「啱啱搶完你錢，再話年底會諗吓點」，更質疑滙豐可能到嗰陣時只係會考慮「還唔還番啲」，仲話支持小股東追究「食息」事件，批評滙豐反口取消派息決定係「講咗唔算數」，仲鬧爆滙豐「咪當港人係傻仔！」
卓妮