中環出更：自爆1998年首被炒魷 洪為民逆境波大翻身
人生總有高低起伏，好似香港菁英會榮譽主席洪為民（Witman）咁，過去嘅工作大多數同IT有關，早期可謂一帆風順，升職加薪快，但亦有低沉嘅時候，佢自爆喺九八年經歷呢世人首次被裁員。
最近好多人都有玩一個遊戲，就係列出十二份工，叫大家估吓邊份係假嘅，即係冇做過嘅工作。Witman都玩埋一份，開估嘅時候仲逐一解釋每份工嘅情況，簡直係一份CV（履歷）嚟。佢好年輕就創業，二十一歲做公司董事。後來受到亞洲金融風暴嘅影響，佢話喺九八年係佢呢世人第一次經歷被裁員，當時仲要供緊層差唔多負資產嘅樓，惟有快快搵過份工，再做番Sales。跟住當然係打逆境波喇，終於又捱番上去，做公司高層，甚至再次創業添！
傅曉琳喺街遇過星探
又睇吓大嶼山發展諮詢委員會成員傅曉琳（Sammi），列出嘅工作包括香水售貨員、電話訪問員、數學補習老師、核數師、議員助理、兼職模特兒同書展售貨員等等。大家估唔估到邊份工係假嘅？開估！Sammi係做過離島區議員，但冇做過議員助理喎。咦！佢做過兼職模特兒？原來喺大學時期，佢喺街頭遇到啲所謂星探，仲話竟然唔係騙案，於是佢貪玩做咗年半，後來發現實在唔係好啱自己。當然之後就冇做喇！
曾經做過食物及衞生局政治助理嘅陳智遠，離開「熱廚房」之後主力做本地文化深度遊，佢列出咗十三份曾領薪金嘅工作，其中一項係政治助理，咁呢項肯定係真o架喇，咁邊份係假？佢開估，答案係臨記。之但係，佢又話其實做過幾次老臨，但每次都係當義工，冇收人工同飯盒，純粹去玩吓，仲叫班網友拍拖要搵老臨，可以隨時搵佢，事關臨時演員都係演員，佢好專業喎。
卓妮