中環出更：與市民共度時艱 張華峰盡捐補貼
新冠肺炎疫情搞到全球經濟下滑，企業裁員及結業更令失業率上升。有見及此，世界各地官員都紛紛提出減薪或捐薪金，希望同市民共度時艱。本港方面，都有部分議員響應捐薪，其中經民聯金融服務界議員張華峰（肥老闆）仲話會將所得嘅政府補貼捐出！
平時議員喺開會期間，發言時都會進行利益申報。話說尋日立法會財務委員會審議政府第二輪防疫抗疫基金撥款，由於好多行業都有受惠，所以尋日喺會上都有議員發言前做咗利益申報，肥老闆都唔例外。
用於抗疫方面
肥老闆當時話，自己現時喺一間證券集團公司做董事長，如果會上通過政府第二輪防疫抗疫基金，佢間公司就可以攞到五萬元補貼喇。至於補貼會點用呢？佢就話，為咗同市民共度時艱，願意捐出呢五萬元補貼，打算用於抗疫方面。
其實有唔少議員出任公司董事，在會上亦有作出申報，例如旅遊界議員姚思榮，佢仲自爆公司喺抗疫基金上亦有得益，但就冇講到攞到幾多錢喇。唔知繼肥老闆之後，會唔會有其他議員都效法捐出所得嘅政府補貼，用嚟做抗疫之用呢？
卓妮