政情：真偽女友視覺下 李庭豐何啟明分途開餐
近日新冠肺炎疫情稍為緩和，街上人流開始增多，唔少人都趁住復活節假期四出搵好嘢食。同屬民協嘅深水埗區議員何啟明（Kalvin）同李庭豐（Jay）前日就趁住復活節長假期嘅最後一日，分別到區內唔同嘅餐廳食晚飯，仲一齊上載咗風格相同嘅食飯相到Facebook（Fb）。唔通佢哋兩個都有戀情要公開？
Kalvin就喺佢嘅Fb上載嘅一張喺餐廳用膳嘅相，見到佢好開心咁剝蝦殼，仲話隻蝦好好味所以食到四萬咁口添。佢亦都喺貼文中tag咗Jay，仲hashtag「偽女友視覺」，唔知Kalvin係咪剝緊蝦畀Jay食呢？之不過，Jay喺唔夠一個鐘內亦都係自己Fb上載自己嘅用膳相，見到佢就去咗兩分鐘路程外嘅另一間餐廳，仲喺貼文中hashtag「真女友視覺」，同tag埋自己女朋友添！點解兩人要隔空做同一動作呢？Kalvin解釋話，因為同行嘅仲有兩個同事，若果加埋Jay同佢女朋友嘅話，就會超過同枱最多四人用膳嘅要求咁話喎。
