政情：鄺葆賢直擊 黃埔小巴結業
喺黃埔區服務咗接近四十年嘅捷輝小巴，四月十一日正式結業，本身嘅2同2A線會由另一間營運商接手，而6同6X線就會停止。當區區議員鄺葆賢喺捷輝執笠嗰日直擊最後一班車嘅情況，嚟咗個第一次，亦都係最後一次嘅小巴tour。
鄺葆賢前日喺社交平台發布咗條短片，短片叫做再見捷輝，鄺形容呢個係佢第一個同最後一個小巴tour，話要同大家一齊見證捷輝服務黃埔四十年嘅最後一日。鄺叫咗熟悉交通工具嘅朋友帶佢參觀捷輝嘅小巴有咩咁特別。鄺上車試戴安全帶，仲發現小巴設有落車鐘同埋會喺指定地點停車，鄺話咁就唔使驚怕醜唔夠膽講司機有落喇。
車頭貼有多謝乘客字句
最後一日經營，小巴嘅車頭玻璃亦貼有多謝乘客嘅字句，而現場都有好多車迷同街坊一齊影相，告別捷輝。鄺話喺鐵路優先嘅交通政策下，其他交通工具營運商惟有自生自滅，令人惋惜。不過鄺都話喺佢跟進嘅時侯，得悉有受協助嘅捷輝員工成功轉職，希望佢哋平安喇。